- Nikulas, Biskop i Oslo, og Chorsbrödrene sammesteds stadfæste Uddards Gave af Markebol i Voll og Markebol i Skepheim til Hovedö Kloster.
- Efter Orig. p. Perg. i norske Rigsarkiv. Begge Segl mangle.
Ollum livandum & viðr komandum guðs vinum & sinum þæim sem þetta bref sea eða hœyra sender N[ikulas] biscup & korsbrœðr í Oslo queðiu guðs & sína. Ver vilium yðr kunnict gera um eign þa er ver guldum Judarðe mote fearlut sínum. halfrar mærkr bol ór Vælli í Gravar kirkiu sokn & annat halfrar mærkr bol or Skæphæimum i Jolund. En Vddarðr gaf þat mærkr bol fram a leið guði & hinni hælgu mœy Mariu & sva hinum hælga Eðmundi staðenum til upphallz í Howðœy. var þetta gort allt með einu skil orðe. scœyt & tryght af vare hende & Vddaröar með allum fullmælum gort. En sa er þetta ryfr eða rofsmenn til fær þa liggi hanum slikt við sem molldrofs manne a við at liggia at logum. Þetta var gort á Gregores mœsso deghi i biscups garðe Anno ab incarnatione mo. cc.xx.iiii. En þesser varo vættir við. Sira. J. Geslengr. Meistare Jon naso. Jon Bataðr. Guðleikr prestr. Jon scolameistare. Hughleikr. Asbiorn kopr. Hallkæl mærr. Olafr giælldkyri & fiolde annara manna.
Bagpaa med gammel Haand: Bref um Skæpeimar i Jolund.
