5. tag vngfärlich darauff gewesst, vnd ist darnach ein yeder wider auff sein schiff gesetzt worden.
Da sind all vnser preyss vnd schiff inn vnser flot gehörend, zusamen kommen, die auff diesmal bey einander gewesst sind, da seind wir inn dem Beldt gelegen, zwischen Fünen vnnd Seeland, biss Kü. Ma. Cristian mit seinem kriegsuolck vnd kriegsrüstung ist geschickt worden, vber den Beldt zu faren vnd zusetzen.
Den 19. Julij, ist Kün. May. vber den Beldt gesetzt worden, oder vbergefürt von Niberck biss zu Karssor inn Seeland.
Da sind wir fort gelauffen, vnd habend etliche Landsknechte vnd geschütz, auff Loland gesetzt, das land habend wir eingnommen, vnd andere land mer, die do beschlossen sind.
Da heffen wir nach dem Sund nach Koppenhagen, do kam vns der wind entgegen, vnd mussten setzen vnder Mönen, vnder Felsterböd, da sind wir auff das land. gefallen, mit etlichen fenlin Landsknechten vnd geschütz, hat sich dies land gegeben, vnd prouant gegeben, wie andere land auch gethon habend.
Da hat man vns wider auff die schiff gesetzt, einen yeden auf das sein, da haben wir auch etliche schütten genommen, darinnen gut bewten gewesst ist, do gab vns Gott wetter vnd winde, das wir zu Sigel giengen mit 44. schiffen von Orlich, vnnd lieffend für Koppenhagen.
Item den 24. tag Julij habend wir Koppenhagen belägert an zwayen orten zu wasser, Auch den Elbogen vnd Landskronen Hellischen Ohr, vnd das Schloss Kroka.
Aber die von Koppenhagen, habend alle jre kriegsschiff vnnd andere schiff, hart vnder die statt oder schloss gelegt, vnd haben kayns inn dem sundt gefunden.
