46 Nu kemr sa maðr i fylki er þu villt sottan hava um eitthvert mal. oc a hann engan ervingia i fylki. oc var eigi þar nott hina helgu. þa scal spyria hann at heimili sinu. En ef hann nemner heimili sit. þa scal hanom þingat stefna. Eigi skal hann segia at lennzmannz. nema þar se. En ef hann vill eigi nemna. þa scal skirskota undir vatta. oc stefna hanom hverium i garð sem þu villt. nema þer siolfum. oc sökia hann þar siðan. þa er oc rett stemt hverium manne. er stemt er a kaupreinu. þar sem þeir keyptuzt við. Sva scal einleypum manne heimstemna sem boanda. þengat sem hann hever ser tveggia missara vist tecna. En ef þat er hvergi. þar scal þingat sem ervingi hans býr innan fylkis. ellar scal spyria hann at heimili sinu. þar scal væra sem hann nemner innan fiorðongs. nema at lendzmannz segi hann.
47 Nu scolo sokner standa meðan leiðangr er uti. til þess er skip hava verit a lunni .v. netr. Standa scolo sokner um langa fosto. kristinndom ma of allt sökia oc ny verc þau er verða. Ecki ma at soknom gera a helgum dogum. nema stemna manne heim at eins. Maðr ma stemna manne heim. heimstemnu annars mannz. sem sialfs sins. ef hanom er um boðet með vattom. Sialfr scal hverr sina sokn sökia innan landz frials fulltiða. En ef maðr ferr af lande braut. þa scal sa hallda fe hans vetr .iij. er hann hever um boðet með vattom at hallda skylldi. sa scal hava sokn oc vorn firi hanom. En ef hann ferr a Grikland. þa scal sa hallda fe hans er arve[1] er nestr. Sva scal kono sökia sem karlmann. ef hon er ein firi sér. en hon a kost at selia sokn sina oc vorn. Eigi scal hon selia lendom manne. ne ofrikis manne þeim er sökia scal. maðr ma sökia hennar sokn sem sina ef hanom er með vattom umboðet. Nu vill maðr annan sökia um eitthvert mál. en hanom hafðe annarr fyrr sokn a hende. þa late sa fyrr af er siðarr toc til. eigi ma hann tveim senn svor veita. ef þat er eigi vela sokn við hinn.
48 Nu eigu tveir menn æða fleiri einn grip saman. þa selr ein. oc spyrr eigi hina at er með hanom eigu. Nu vilia þeir riuva kaup þat er með hanom eigu. þa scal luta hverr raða scal. en ef sa lytr at raða er selldi. þa scal hallða. En ef hinir liota er riuva vilia. þa scolo þeir riuva a fyrsta manaðe. er þeir verða varer við.
49 Sa scal lán abyrgiast er þiggr. oc koma heilu heim. En ef hann vill eigi. þa scal sökia sem vitta fe. En þat er allt vitta fe er vattar vitu. Nu lér maðr þat er hanom er lét oc misferr þat. þa scal hann heimta at hvarom sem hann vill. oc
- ↑ Ordene "er arve" staae ved en Feilskrivning to Gange i Mbr.
