hallda. En ef hann visar hanom ór vist oc gengr hann husa a milli. þa scal hann giallda mercr .iij. oc varðveita hanom. sem mælt var. Sva scal hverr giallda er ganga lætr sinn umaga husa amilli. sem ec hevi nu talt.
71 A þingi scal skulldarmann taca bioðasc frendum fyst. sa er nestr er nanastr er. ef hann vill hava. æða sa ellar er hann vill hellzt selia. Engi ma kono sva taca i skulld. nema have frenda rað við. Leysings born ma taca i fiolda hverium er vill. Hallda scal slict allt sem menn verða a satter. oc vattar vitu. Eigi scal hann með hoggum raða hanom til verca. nema hann megi eigi[1] fa af hanom skulld sina. en siðan er hann rett laus við hann oc hans kono. oc man hans allt. oc sva hvért þeirra við annat. En ef aðrer menn liósta hann. þa a hann slican rett a hanom sem a brytia sinum. sialfr a hann þat er auc er slics rettar sem hann a burð til. En iamdýrr scal hann þa at rette sem hann være skulldlaus. En ef skulldarkona legst með þræle. þa a armaðr ecki a henne fyrr en hon have golldet hina skulld. Nu ef maðr selr skulldar mann mansale. nema hann laupi ór skulld. þa er hann seccr .xl. marca. oc sva hverr frialsan mann selr. En ef lendr maðr selr. þa scal hann halft kononge giallda. en halft fylkismonnum. En ef armaðr konongs selr. þa scal hann giallda .xl. marca fylkismonnum. Ættborenn maðr ma geva barn sitt i skulld. ef hann gefr a þingi. æða at oldrhusi. æða at kirkiu sokn. þa ma hann geva i þriggia marca skulld oc eigi meiri. þa scal þat hallda. scal eigi barnet riuva oc engi maðr annarra. Nu scal hann neyta skulldar mann sinn. sem þræl sinn. oc sva föra hann til verca. þa scal orco geva hanom sem þrælom sinum. Nu scal hann þar væra oc fa þa aura er hann er fastr. ef hann vill eigi þa hava verit. þa scal hann eiga umhvarf halvan manað innan fylkis at sysla um skulld. þa er hann a at giallda. En ef hann ferr huldu hofðe. æða ór fylki. þa er hann þræll ef hinn tecr hann er skulld a at hanom. Engan a konongr rett a skulldar manne. þar sem sialfr hann a engan rett a ser. Nu gefsc maðr i skulld frials oc fulltiða oc ættborenn. þa ma hann gefasc i sva micla skulld sem hann vill. Nu vill sa aura hava af skulldar manne sinum. þa er vel ef hann syslar sialfr um. En ef hann vill eigi sialfr um sysla. þa scal hann bioða frendom. þa er vel ef þeir vilja hava keypt. ellar scal hann selia, hann hvert er hann vill innanlandz. oc selia at aurum eigi meirum en hann var fastr. Engi maðr scal selia frialsan mann mansale. en ef hann verðr at þvi kunnr oc sannr. þa scal hann giallda .xl. marca. oc sva hinn er kaupir. ef hann veit at hann var frials. Nu ef skulldar maðr getr born. þa er vel ef hann a sialfr fe til. at fela born sin af hende ser. en ef hann a eigi sialfr fe til. þa scal sa fela er skulld
- ↑ Her begynder 1ste Blad af Brudst. D, og ophörer ved Capitlets Ende.
