| Gulathings-Lov | 77 |
Sva scal broðor dottor syni hins dauða at somu. oc moðor bröðr oc systur syni. oc systlingi hins dauða. Sva scal hverr þeirra böta er i upname ero með bröðrongonom. Nu scal bröðrongr viganda böta systur syni[1] hins dauða tva luti niunda pennings oc ærtog. Sva scal hverr þeirra i þvi upname. Sva scolo þeir böta bröðrongs barne. oc bröðrongi faður hans. oc moðor bröðr moðor hans. oc systur dottor syni. Sva scolo þeir aller böta er i upname ero með bröðrunginum.
227 Nv scal systrungr viganda böta syni hins dauða .ij. aurum. Sva scal systur dottor sunr viganda at somu. oc bröðrongsbarn. oc moðor broðer moðor hans. En fiorar ærtogar bröðr hins dauða. hverr þeirra fiugurra. En faður bröðr hins dauða .iij. penningum minna en eyri. Slict broðor syni hins dauða oc moðor feðr oc dottor syni. Slica bot a systryngr viganda oc systur dottor sunr. oc bröðrongs barn. oc moðorbroðer moðor hins dauða.[2] þeirra scal hverr böta atian penningum moðor bröðr hins dauða. Sva scal böta systur syni hins dauða. oc sva hverr þeirra bröðrongi hins dauða. Slica bot a broðor dottor sunr hins dauða af hverium þeirra. Systrungr viganda scal böta systrungi hins dauða .xii. penningum. Sva scal böta systur dottor syni at somu. oc bröðrongsbarne oc moðor bröðr moðor hins dauða.[3] Slict scal systur dottor sunr böta sem systrungr. Sva scal bröðrongs barn.[4] oc moðor broðer moðor viganda .xii. penninga scal hverr þeirra böta or öfsta upname. Nu hevi ec upnama menn alla talda. Sva scal hverr öðrom böta sem nu hevi ec talt. En hvervitna þar sem manne firrist frendseme fra upnama monnum út. þa fellr bot þriðiungi sem tala rennr til.
228 Þeir aller er morc taca i upnameno fyrsta at viganda. þeir scolo taca þriðiungi minna at bröðr viganda. þat verðr ærtog setta eyris. En þeir aller i miðupname er taca .vi. aura at viganda. þa scolo þeir taca þriðiungi minna at bröðr viganda. en þat er holf morc. En þeir menn aller er[5] i upnameno öfsta. er halva morc taca at viganda[6] þeir scolo taca þriðiungi minna at bröðr viganda. þat verðr ærtog minna en .iij. aurar.
229 Nv scal vigande hava með ser i sokum faður broðor. oc broðor sun. oc hallda upp sökum firi þa. þo at þeir væri alldrigi menn i heimi. en sialver þeir firi sic. ef þeir ero til.
- ↑ Feilskrift for systrungi, see ovenfor. Brudst. Cc. har systrungi.
- ↑ „hins dauða“ staar aabenbar ved en Uagtsomhet istf. viganda; dog synes ogsaa Ordene at luka eller at giallda at burde tilföies. hins dauða mgl. i. Cc.
- ↑ oc bröðrongi faður hans synes at burde tilföies.
- ↑ oc bröðrongr faður hans synes at burde tilföies.
- ↑ Saaledes i Mbr. „er“ synes at være tilfoiet af Uagtsomhet.
- ↑ Her ender förste Blad af Cc.
