89 Nu leigir maðr iorð af þæim sem a at leigomala rættom. þa skal hann þa iorð hava heimilega .xij. manaðe at bua a. oc inna hinom leigo firer slika sem þæir urdo asatter. Nu er leiga eindagat oc kemr eigi fram i eindaga þa uheimilar hann ser iorð. Nu reiðir hann suma leigo en suma eigi. þa scal sækia með vatta þat er epter stendr sem aðrar fiarsoknir. oc sua þo at til allrar þurfe at sækia. hann skal a iorðu bua til fardaga at ǫðru vare. Af þæirri iorðu ma maðr ekke oðrom selia a leigo til heimilldar uema haun seilde þat þa er hann tok. at hann mynde oðrom manne af selia með ser. En ef hann selr. þa er honom iorð oheimol oc sua hinom er tekr. bæte landnami hvarttueggia oc heimili ser sua iorð sa er tok af landz drotne. Af skal hinn fara er af leigoliða tok allt þat er hann verðr sins um. þa scal hinn bæta honom oc .vj. aurom at haudsalstite. þuiat sua scal huerr bæta er oðrom selr uheimilt. nema hann have aðra iorð iafngoða at fa honom.
90 Nv skal hann husum upphallda ollom þæim er a varu þa er hann kom til. þat skal hann eigi abyrgiaz at hus fyrnez. Nu ef husgerð er mællt a henndr honom þa skal hann gort hafa aðr hann ferr af iorðo. En ef hann hever ugort giallde lannzdrotne husverð aðr hann fare brot. eða late gera hus sem scilt var. Nu gerir hann þau hus er eigi varo mællt a henndr honom. þa gerir hann þau ser sialfvom. Hann scal honom bioða at kaupa þat hus er iorð a með vattom. En ef hann vil þat helldr þa fære hann i brot fire farðaga. En ef hann ferr utan heraðs bioðe hann þæim er til iarðar ferr. Nu ef hus stenndr epter fardaga þa a hinn hus er iorð a. nema hann fære viðenn a holkn eða reysar þar er huarke spille akri ne eng fire farðaga. þa er hann a hellz tom at. Leiglenndingr skal fara til lanz þa er .vj. uikur ero af sumre. þa er honom heimill hage oc fǫt sin inn at bera oc sculo þæir miðlaz husrum við. En ef eigi vinnr þæim husrum baðom. þa a sa heimil fiarhus .iij. nætr er aðr byr a lande. þuiat æins a sa er þa scal a lande bua smala sinn inni at hava til laugardags at hinn love er fire sitr. eða þarf eigi allt husrum. En siðan a sa fire lande at raða oc husom er leigt hever. en þegar er vj.vikur ero af sumre. þa a hinn eigi er aðr bio þar at beita eng. hafa a hann þar ros i haga til sunodags. En annan smala þar til er liðr helgina. Nætt er oc at hann se þar sunnoðaginn með hinn sin oc ero honom þa heimol fiarhus til innivistar ef þæim vinnaz baðom eigi inni hus. þuiat eins scal smala sinn inni hava ef þæim vinnr baðom rum. oc fara i brot manaðagenn. nema þa se logheilagt ella nott siðarr með smala sinn allann oc onnor fong.
91 Hvrrðer scal hann eptir lata standa þriar þo at enge væri þa er hann kom. stofo hurð. burshurð. uti hurð. En standa sculo allar þær er fyrr stoðo. Nu ef
- Jvfr. Cap. 89. G. 72. Cap. 90. G. 73. Cap. 91. G. 75.
